Մեծ պահքի ուղին – Քահանայի պատրաստությունը

Մեծ պահքի ուղու այս հինգերորդ օրը՝ Սուրբ Պատարագի խորհրդի մեջ, մենք ավարտում ենք ֆիզիկական պատրաստությանը նվիրված մեր հանդիպումները՝ անդրադառնալով շուրջառի դերին։ Մինչ այժմ մենք հետևել ենք եկեղեցու ավանդատանը քահանայի կերպարանափոխությանը։ Նա հագել է նոր հանդերձներ՝ այն հատուկ զգեստները, որոնք նախատեսված են Սուրբ Պատարագի մատուցման համար։

Ինչպես հուշում է «շուրջառ» անվանումը, այն պատում է քահանայի ամբողջ մարմինը։ Այս պահին նա աղոթում է. «Տե՛ր, Քո ողորմությամբ ինձ պարուրիր լուսավոր զգեստով և ամրացրու չարի ազդեցությունների դեմ, որպեսզի արժանի լինեմ փառաբանելու Քո սուրբ անունը»։ Երբ քահանան հագնում է զգեստի այս վերջին մասը, բացահայտվում է Պատարագի բուն նպատակը։ Թեև շուրջառը զարդարուն է, պայծառ ու գունագեղ, քահանան հիշում է, որ այս խորհուրդը կատարվում է ոչ թե իր, այլ Աստծո փառքի համար։

Որպես հզոր վահան՝ շուրջառը քահանային պարուրում է հատուկ էներգիայով։ Այս էներգիան գեղեցկության և ուժի միասնությունն է։ Հաճախ այս երկու բառերը չեն օգտագործվում միասին՝ ինչ-որ բան նկարագրելիս։ Մենք նույնիսկ դրանք դիտարկում ենք որպես իրար հակադիր հասկացություններ։ Այստեղ շուրջառը մեզ ցույց է տալիս, որ գեղեցկության մեջ կա ուժ, իսկ ուժի մեջ՝ գեղեցկություն։ Դրանք ոչ միայն բացառիկ չեն միմյանց համար, այլև իրար անհրաժեշտ բաղադրիչներ են։ Շուրջառը, որպես զգեստի վերին մաս, ճառագում է և իշխում չարի ուժերի վրա։ Չկա ավելի մեծ և հզոր բան, քան կատարյալ գեղեցկությունը, որը բարության և սիրո արտահայտությունն է։ Հիսուսը մարմնացյալ Սեր ու Բարություն էր, և Նրա ուժն ու զորությունը փոխեցին աշխարհի հիմքերը, քանի որ այդ ուժի դրսևորումը բարի գործերի մեջ է։  

Այսօրվա դասն այն է, որ թեև քահանան կանգնած է գեղեցիկ զգեստներով՝ որպես նոր մարդ, խորանի և հավատացյալների առջև, նա այնտեղ է որպես ծառա՝ ծառայելու իրենից ավելի մեծին։ Նա հանել է հին հագուստը և հագել նոր զգեստներ, որոնք նրան առանձնացնում են աշխարհից՝ հիշեցնելով, որ այս ուղին վեր է կյանքի առօրյա ծեսերից։ Եսասիրությունը հաղթահարված է։ Խոսքը ոչ թե նրա, այլ Նրա մասին է, Ով նրա Արարիչն է։

Մինչ մենք պատրաստվում ենք մեզ սպասող ուղուն, եկեք խորհենք մեր նորության մասին։ Յուրաքանչյուր հագուստ ունի իր նպատակն ու առաքելությունը։ Այդպես է նաև մեր կյանքում. յուրաքանչյուր սրտխփոց, յուրաքանչյուր թարթում, մեր մարմնի յուրաքանչյուր մկան ու օրգան ունի գործառույթ և նպատակ, որը պետք է ներդաշնակ լինի մեր զգացմունքների, մտքերի և հոգու հետ։ Մենք կոչված ենք խորհելու մեր յուրահատկության, մեր գեղեցկության և հրաշքի զգացումի մասին. յուրաքանչյուրս առանձնացված ենք մյուսից՝ միայն նրա համար, որպեսզի կրկին միավորվենք՝ միմյանց սիրելու նպատակով։