2023 թվականի դեկտեմբերի 10-ը հիշարժան և պատմական օր էր Հայոց եկեղեցու կյանքում։ Ամբողջ աշխարհից ավելի քան 200 մարդ մասնակցեց ամենամյա Քաթիայի մանուկների հիշատակի օրվան, որն առաջին անգամ անցկացվեց մետատիեզերքում։

Այս միջավայրում ընտանիքները հնարավորություն ունեցան հարգելու իրենց սիրելիների՝ այն մանուկների հիշատակը, որոնք կյանքից հեռացան վաղաժամ։

Արևմտյան թեմի «In His Shoes» ծառայությունը 1997 թվականին Քաթիա Համբարյանի ողբերգական մահից ի վեր ամեն տարի անցկացնում է մանուկների հիշատակի և մոմավառության արարողություն։ Մանուկների հիշատակի այս վայրը, որը կրում է Քաթիայի անունը, ցավոք, ընդլայնվել է՝ համալրվելով նորանոր մանուկների անուններով։

Ինչպես նշում է Տեր Վազգեն քահանա Մովսեսյանը, ով ղեկավարում է «In His Shoes» և Epostle.net կազմակերպությունները. «Սա մեր ծրագրերի և տեխնոլոգիաների բնական համադրությունն էր։ Այս տարվա սկզբից Epostle.net-ը աշխատում է տարբեր վեբ-կառույցների վրա՝ հնագույն խորաններից մինչև թվային հարթակներ։ Մենք ոգևորված ենք ստեղծագործական տնօրեն Գրեգորի Բեյլերյանի հետ համագործակցությամբ, որպեսզի Հայոց եկեղեցու այս հարթությունը հասանելի դարձնենք ընդլայնվող թվային տիեզերքում»։

Հիշատակի վայրը կառուցվել է Արցախի Ղազանչեցոց տաճարի վիրտուալ մոդելի հիման վրա՝ որպես հիշեցում այն մանուկների, կյանքի և հողի, որոնք կորցրինք այս տարի Լեռնային Ղարաբաղում տեղի ունեցած ողբերգությունների հետևանքով։ Այդ առիթով նույն օրը մեկնարկեց նաև մանուկների հովանավորության ծրագիր։

Մանկան կորուստը, անկասկած, կյանքի ամենաողբերգական փորձառությունն է։ Հատկապես դժվար են տոները, երբ հավաքույթներն ու տոնակատարություններն ընդգծում են այն կորուստը, որը ստիպված են կրել ընտանիքները։ 1997 թվականին նախագահ Քլինթոնի հռչակագրով դեկտեմբերի երկրորդ կիրակին Միացյալ Նահանգներում սահմանվել է որպես Մանուկների հիշատակի օր։ Քաթիայի մանուկների հիշատակի վայրի «դռները» բացվեցին 2023 թվականի դեկտեմբերի 10-ի կեսգիշերին և շարունակում են բաց մնալ։