Սուրբ Ծննդյան պահք 29:50. Երեք մատ հետ

Գալստյան 50 օրերից 29-րդ օրը. Երեք մատ դեպի Ձեզ

Քրիստոնեական հավատքի արտահայտման երեք տարրերն են ողորմածությունը, աղոթքը և պահքը։ Ես խնդրում եմ, որ Դուք Ձեր Գալստյան օրագրում նշում կատարեք «կեղծավոր» բառի վերաբերյալ, քանի որ Հիսուսն այս բառն օգտագործում է որպես հակառակորդ՝ հավատքի արտահայտման մասին Իր յուրաքանչյուր ուսմունքում։ Նա զգուշացնում և պատվիրում է մեզ. «Մի՛ եղեք կեղծավորների պես, որոնք ցանկանում են, որ իրենց արարքները նկատվեն ուրիշների կողմից»։ Եվ այսպես, նրանց դրդապատճառը խեղաթյուրված է։

Ողորմածության դեպքում Հիսուսը զգուշացնում է՝ թող Ձեր ձախ ձեռքը չիմանա, թե ինչ է անում աջը։ Աղոթքի համար Նա ասում է՝ մի՛ օգտագործեք ավելորդ բառեր և մի՛ ցուցադրեք Ձեր կրոնը ուրիշների առաջ։ Իսկ պահքի դեպքում Նա զգուշացնում է չաղավաղել Ձեր արտաքին տեսքը՝ ուրիշների կարեկցանքը շահելու համար։ Եվ յուրաքանչյուր դեպքում Հիսուսի զգուշացմանը հաջորդում է այն հավաստիացումը, որ կեղծավորն արդեն ստացել է իր վարձատրությունը։

Աստծո հետ Ձեր հարաբերությունը Ձերն է։ Այն մտերիմ է։ Այն Ձեր և Աստծո միջև է։ Ողորմածության, աղոթքի և պահքի Ձեր գործերում Դուք կանգնած եք Աստծո և ոչ ոքի առաջ։ Հիսուսը կեղծավորին բնորոշում է որպես մեկի, ով ավելի շատ մտահոգված է ուրիշների կողմից տեսանելի լինելով։

Նախքան առաջ շարժվելը, ես ցանկանում եմ Ձեզ տալ «Արմոդոքսի» (Armodoxy) կանոնը. Հիսուսն իրավունք ունի մարդկանց կեղծավոր անվանելու, իսկ մենք՝ ոչ։ Հիսուսն անմեղ է։ Քրիստոնեության մեջ գայթակղություններից մեկը Հիսուսին միանալն է կեղծավորներին մերկացնելու հարցում։ Դա վերապահված է միայն Հիսուսին։ Հիշե՛ք, երբ Դուք մատնացույց եք անում ինչ-որ մեկին, երեք մատ ցույց է տալիս դեպի Ձեզ։

Հիսուսը մաքուր է և անմեղ։ Նա կարող է մերկացնել կեղծավորին։ Դուք կնկատեք, որ Հիսուսը հանդուրժում է յուրաքանչյուր մարդու, յուրաքանչյուր տեսակի մեղավորի և նրանց մեղքի բնույթը։ Միակ մարդը, ում Նա չի կարող հանդուրժել և միակը, ում Նա մերկացնում է, կեղծավորն է։ Մինչ մենք առաջ ենք շարժվում Հիսուսի էական ուսմունքներում, անհրաժեշտ է հիշել այս կանոնը. մեր գործը Հիսուսին հետևելն է և նկատել այն մատը, որը ցույց է տալիս դեպի մեզ։ Այլ կերպ ասած՝ նախ եղե՛ք մաքուր և ձգտե՛ք Աստծո արքայությանը։

Աղոթենք Սուրբ Ներսես Շնորհալու «Հավատով խոստովանիմ» աղոթքի տասնմեկերորդ ժամից. «Հիսուս, Հոր իմաստություն, տո՛ւր ինձ իմաստություն, որպեսզի միշտ մտածեմ, խոսեմ և անեմ այն, ինչ բարի է Քո աչքերում, փրկի՛ր ինձ չար մտքերից, խոսքերից և գործերից։ Ողորմի՛ր Քո արարածներին և ինձ՝ մեղավորիս։ Ամեն»։

Շապիկ՝ Envato Elements