Գալուստ 37-50. Սուրբ Ծնունդ

Գալստյան 50 օրերից 37-րդը. Սուրբ Ծնունդ

Մեր Գալստյան ուղևորության այս օրը մենք հանդիպում ենք Սուրբ Ծննդին։ Դեկտեմբերի 25-ը լայնորեն ընդունված է որպես Սուրբ Ծննդյան օր։ Մենք շարունակում ենք Գալստյան շրջանը, քանի որ մեր նպատակակետը հունվարի 6-ն է՝ Աստվածահայտնությունը։ Ցավոք, ոչ ոք չի կարող հստակ ասել, թե ինչ է Սուրբ Ծննդյան տոնն այսօր։ Ոմանց համար դա Հիսուսի ծննդյան օրն է, իսկ ոմանց համար՝ զուտ աշխարհիկ տոն՝ հոլիի տերևներով և գեղեցիկ զարդարանքներով։ Կրոնական և աշխարհիկ տոնակատարությունների միջև կան բազմաթիվ տարբեր աստիճաններ և կատեգորիաներ։ Ոմանք համաձայն են, որ դա Հիսուսի ծննդյան օրն է, բայց այն պարտադիր չէ, որ կապված լինի որևէ կրոնական նշանակության հետ. Հիսուսը լավ մարդ էր, ոչ ավելին։ Մյուսներն իրենց քրիստոնյա են համարում, քանի որ այդ օրը տոնածառ են զարդարում և մասնակցում Սուրբ Ծննդյան պատարագի։ Իրոք, տոնի բազմաթիվ տարբեր աստիճաններ և կատեգորիաներ կան, և յուրաքանչյուր արտահայտություն կարող է օրինական հիմքերով պնդել, որ նրանք տոնում են Սուրբ Ծնունդը։

Մենք բավարարված ենք այսօրը Սուրբ Ծնունդ անվանելով։ Ի հակադրություն, տոնն արտահայտելու համար մեր օգտագործած անունը՝ Աստվածահայտնություն, որը բառացիորեն նշանակում է Աստծո հայտնություն, բացատրում է Եկեղեցու դիրքորոշումը։ Հենց Աստվածահայտնության համար ենք մենք պատրաստվում այս Գալստյան ուղևորության ընթացքում։ Տիեզերքի Արարիչը և Կյանքի Հեղինակը հայտնվում է մեր մեջ։ Եվ թեև մենք պաշտոնապես ճանաչում ենք սկզբնական ամսաթիվը՝ հունվարի 6-ը, որպես Աստվածահայտնության տոնի օր, որպես քրիստոնյաներ՝ Դուք պետք է պատրաստ, կամեցող և ընդունակ լինեք տոնելու Աստծո Հայտնությունը ամեն օր՝ հունվարի 6-ին, 7-ին և 8-ին, փետրվարի 11-ին, 12-ին և 13-ին, ապրիլի 14-ին, 15-ին և 16-ին, և ամեն օր ու ամեն առիթով, որ ունեք՝ հռչակելու Ձեր ուրախությունն ու երախտագիտությունը այն կյանքի համար, որը վայելում եք Հիսուս Քրիստոսի միջոցով։

Հենց այս պատճառով է, որ Դուք այս Գալստյան ուղևորության մեջ եք, որպեսզի հունվարի 6-ին հասնելիս հասկանաք Հիսուսի էական ուսմունքները և կիրառեք դրանք Ձեր կյանքում ամեն օր, երբ շնչում և ապրում եք։

Շնորհավոր Սուրբ Ծնունդ՝ այսօր և վաղը։ Տոնեք Ծնունդը և մուտք գործեք Սուրբ Ծննդյան 12 օրերի մեջ մինչև հունվարի 6-ը։ Հեռու լինելով սրնգահարներից, ցատկող լորդերից, կթվորուհիներից և տանձենու վրայի կաքավից՝ այս հաջորդ 12 օրերը Ձեզ համար կամփոփեն Հիսուսի էական ուսմունքների ուսումնասիրությունը, որպեսզի, ինչպես խոստացվել էր, հունվարի 6-ին, երբ Դուք ասեք «Քրիստոս ծնաւ և յայտնեցաւ», այդ բառերը իմաստ ունենան Ձեր կյանքի և այն աշխարհի համար, որին Դուք հպվում եք Ձեր սիրով։

Սուրբծննդյան մաղթանք Ձեզ և մեր աշխարհին…

Թող հրեշտակների ուրախությունը,
հովիվների եռանդը,
իմաստունների համառությունը,
Հովսեփի և Մարիամի հնազանդությունը
և մանուկ Քրիստոսի խաղաղությունը
լինեն Ձերը այս Սուրբ Ծննդյան տոնին։
Եվ թող Ամենակարող Աստծո՝
Հոր, Որդու և Սուրբ Հոգու օրհնությունը
լինի Ձեզ վրա և մշտապես մնա Ձեզ հետ։ Ամեն։

Շապիկ՝ Envato Elements