Մեծ պահքի ուղի 2020, 40-օրյա շրջանի 5-րդ օրը (40-ից)

Ուրբաթ, փետրվարի 28 – Մեծ պահք 2020, 40 օրերից 5-րդ օրը

Հիսուսն ասում է մեզ. «Ձեր երկնավոր Հայրը գիտի, թե ինչ է ձեզ պետք, նախքան դուք կխնդրեք Նրան», ինչն էլ հարց է առաջացնում՝ ինչո՞ւ աղոթել: Որքան էլ աղոթքը Աստծո հետ զրույց է, այն նույնքան էլ զրույց է սեփական անձի հետ: Գուցե տարօրինակ հնչի, որ մարդը կարող է չգիտակցել իր սեփական կարիքները, սակայն մենք հաճախ կորցնում ենք կյանքի ուղենիշը և չենք հասկանում, որ մեր կարիքներից շատերը մեր իսկ ձեռքերում են: Աստծուն ուղղված աղոթքն արթնացնում և ամրապնդում է մեր վճռականությունը՝ իրականացնելու մեր երազանքները: «Արդ, դուք այսպե՛ս աղոթեցեք,- ասում է Քրիստոս,- Հա՛յր մեր, որ երկնքում ես, սուրբ թող լինի քո անունը, թող գա քո արքայությունը, թող լինի քո կամքը երկրի վրա, ինչպես երկնքում: Մեր հանապազօրյա հացը տուր մեզ այսօր: Եվ ներիր մեզ մեր պարտքերը, ինչպես և մենք ենք ներում մեր պարտապաններին: Եվ մեզ փորձության մի՛ տար, այլ փրկի՛ր մեզ չարից...» (Մատթեոս 6): Աղոթե՛ք այնպես, որ յուրաքանչյուր բառ և յուրաքանչյուր արտահայտություն Ձեզ կապի Աստծո և Նրա Արքայության հետ: