Հայկական ուղղափառությունն այսօր. Ուժը մարդկության մեջ

The Beatles խմբի «Let it Be» երգը մի քանի պատճառով ջերմ ու հոգևոր երանգ ունի։ Ներածական ակորդները սահմանում են երգի տրամադրությունը։ «Let it Be» կրկներգի բառերը «Ամեն» բառի սահմանումն են։ Երգում կան Սուրբ Մարիամ Աստվածածնին վերաբերող մի քանի հղումներ։ Երգի համաձայն՝ Նա «գալիս է ինձ մոտ» և արտասանում «իմաստության խոսքեր»։ Օրհնյալ Մոր հետ կապը հեշտ է պատկերացնել, սակայն մենք հասկանում ենք, որ դա մի կապ է, որը մենք ենթադրում ենք մեր նախապաշարմունքների պատճառով։ Երգի հեղինակի՝ սըր Փոլ Մաքքարթնիի խոսքով՝ Մարիամ Աստվածածնի մասին այս հղումը վերաբերում է իր սեփական մորը՝ Մերի Պատրիսիա Մաքքարթնիին, որին նա կորցրել է վաղ տարիքում։ Երգը գրվել է մի երազի մասին, որում մայրը գալիս է նրա մոտ՝ իմաստության խոսքերով։

Մեր կրոնական նախապաշարմունքները մեծ դեր են խաղում այն հարցում, թե ինչպես ենք մենք ընկալում աշխարհը և փոխազդում նրա հետ։ Քանի որ Սուրբ Մարիամը՝ Աստվածածինը, պատմության մեջ առանձնացվել է Քրիստոս Մանուկին կրելու համար, մենք իրավամբ նշում ենք նրա տոներն ու հիշատակի օրերը՝ կենտրոնանալով նրա սրբության վրա։ Սակայն Սուրբ Մարիամի, ինչպես և բոլոր սրբերի ուժը, նրանց մարդկային էության մեջ է։

Սրբերը, այդ թվում՝ Սուրբ Մարիամը, աստվածներ չեն։ Հայ եկեղեցում նրանք չեն երկրպագվում։ Փոխարենը՝ նրանք մեծարվում են, այսինքն՝ նրանց նկատմամբ մեծ հարգանք ու ակնածանք է տածվում։ Քանի որ նրանք մարդ են, մենք կարող ենք նրանց դիտարկել որպես մեր կյանքի օրինակներ։ Սա սրբերի շատ կարևոր գործառույթ է։ Որպես մարդիկ՝ նրանք ունեցել են այն բոլոր թուլություններն ու դժվարությունները, որոնք ունեն մարդիկ։ Նրանք ունեցել են նույն գայթակղություններն ու կասկածները, որոնք ունենք բոլորս։ Տարբերությունն այն է, որ նրանք իրենց մարդկային էությունից վեր են բարձրացել՝ հպվելու աստվածայինին։ Այդպիսով նրանք մեզ հույս են տալիս, որ մենք նույնպես կարող ենք վեր բարձրանալ մեր մարդկային էությունից և հպվել կամ մասնակից լինել աստվածային ոլորտին։

Նրան խնդրեցին ծննդաբերել առանց ամուսնության։ Այն գիշեր, երբ Նա լույս աշխարհ բերեց Հիսուս Մանկանը, ոչ իջևանատանը, ոչ էլ աշխարհում Նրա համար տեղ չգտնվեց։ Նա ականատես եղավ անմեղների սպանությանը։ Նա իր սրտում պահեց Հիսուսի մանկության բոլոր մանրամասները։ Նա Խաչի մոտ էր, երբ իր Որդուն գամեցին Խաչին և ոչնչացրեցին Իր իսկ արարածները։

Վերափոխման տոնին մենք հրավիրված ենք խորհելու Օրհնյալ Մայր Մարիամի, նրա պայքարի ու դժվարությունների մասին, և թե ինչպես նա հաղթահարեց դրանցից յուրաքանչյուրը՝ դառնալու «օրհնյալ կանանց մեջ»։ (Ղուկաս 1:42)

Մենք աղոթում ենք Եկեղեցու աղոթքով. «Աղաչում ենք Քեզ, Սուրբ Մարիամ, փառքով լի և Աստծո ծնող՝ Աստվածածին, բարձրացրու մեր աղոթքները դեպի Քո սիրելի Որդին, որպեսզի Նա ներողամիտ լինի մեր մեղքերին։ Ամեն»։