Armodoxy-ն այսօր. Ճիշտ ժամանակն է

2025 թվականի փետրվարի 21-ին՝ ուրբաթ օրը, Մոնտեբելոյի Հայոց ցեղասպանության հուշարձանը Կալիֆոռնիա նահանգի կողմից ճանաչվեց որպես պատմական հուշարձան՝ համալրելով նահանգի այլ պատմական վայրերի շարքը, ինչպիսիք են Գոլդեն Գեյթ կամուրջը, Հերսթ ամրոցը և Լոս Անջելեսի Կոլիզեյը։

Հայոց ցեղասպանության հուշարձանի կառուցման ծրագրերը 60 տարի առաջ մի երազանք էին։ Մոտավորապես նույն ժամանակ Հայաստանի մայրաքաղաք Երևանում սկսեցին ձևավորվել Ծիծեռնակաբերդի հուշահամալիրի կառուցման պլանները, որն այսօր մի համալիրի մաս է կազմում և ամեն տարի հարյուր հազարավոր մարդկանց է ընդունում։

Հայոց ցեղասպանությունը 1915-ից 1922 թվականներին խլեց 1,5 միլիոն հայերի կյանք։ Հենց Ցեղասպանությունը վերապրածների զավակներն էին՝ թե՛ Հայաստանում, թե՛ Կալիֆոռնիայում, որ երազեցին և կյանքի կոչեցին այս հուշարձանները։

Հայրս այդ երազողներից մեկն էր։ Նա այն 18 տղամարդկանցից էր, որոնք կազմում էին Հայկական հուշարձանի խորհուրդը (Մոնտեբելո) և 1968 թվականին այդ երազանքը իրականություն դարձրին։ Հուշարձանի բացման ժամանակ ես 12 տարեկան էի, բայց հիշում եմ մի շարք միջոցառումներ՝ հիմնարկեքից սկսած, որտեղ մենք՝ խորհրդի անդամների երեխաներս, «օգնականներ» էինք. կատարում էինք սևագործ աշխատանքներ, միջոցառումների ժամանակ վաճառում էինք հուշանվերներ ու կրծքանշաններ՝ մի քանի դոլար հավաքելու համար։

Ասում են՝ ժամանակն ամեն ինչ է։ Այս կառույցների ձևավորման համար ժամանակը հասունացել էր։ Խորհրդային Միության մաս կազմող Հայաստանում ժամանակը ճիշտ էր. սա տեղի ունեցավ հետստալինյան շրջանում։ Ամերիկայում դա Քաղաքացիական իրավունքների շարժման ժամանակաշրջանն էր, երբ էթնիկ պատկանելությունը սկսեց արժևորվել։ Աֆրոամերիկյան համայնքը ըմբոստանում էր սեգրեգացիայի դեմ։ Մարտին Լյութեր Քինգ կրտսերը 1963 թվականին արտասանել էր իր «Ես երազանք ունեմ» ճառը, և ցուցարարները վանկարկում էին «Սևը գեղեցիկ է»՝ որպես էթնիկ հպարտության կարգախոս։ Այն տարածվեց, և մեքսիկացիները սկսեցին վանկարկել «Շագանակագույնը գեղեցիկ է», իսկ հայերը միացան երգչախմբին՝ «Ձիթապտղագույնը գեղեցիկ է» կարգախոսով։

Ժամանակը հասունացել էր, և ամեն ինչ իր տեղն ընկավ։ Այս շաբաթ Armodoxy-ն այսօր հաղորդաշարում մենք կքննարկենք ժամանակի գործոնը և այն, թե ինչպես են մեծ ու փոքր իրադարձությունները տեղի ունենում ժամանակի ընթացքում, ինչ է նշանակում «Աստծո ժամանակ» և ինչու է համբերությունը առաքինություն։

Ձեզ եմ ներկայացնում այս նուրբ աղոթքը. «Սիրելի՛ Տեր, ինձ տո՛ւր համբերություն դժվարին պահերին։ Օգնի՛ր ինձ վստահել Քո սահմանած ժամանակին՝ իմանալով, որ ամեն ինչ կատարվում է Քո աստվածային ծրագրով։ Առաջնորդի՛ր սիրտս, որպեսզի մնամ հանգիստ ու հաստատակամ նույնիսկ այն ժամանակ, երբ ուղին անորոշ է թվում։ Լցրո՛ւ ինձ Քո խաղաղությամբ ու իմաստությամբ, որպեսզի կարողանամ դիմանալ շնորհքով և հավատքով։ Ամեն»։