Պարզ պատգամաբերներ պարզ պատգամների համար

Armodoxy-ն այսօր. Պարզ պատգամաբերներ պարզ պատգամների համար

Մեր հավատքին հասցվող մեծագույն վնասներից մեկն այն է, երբ մենք չափազանց դրամատիզմի ենք ենթարկում կամ առասպելականացնում ենք մեր հավատքի կերպարներին այն աստիճան, որ նրանք վերածվում են ֆանտազիայի: Հետևաբար, նրանք կորցնում են իրենց իմաստն ու նշանակությունը մեզ համար:

Մենք հակված ենք չափազանց դրամատիկացնել կրոնական գաղափարներն ու հասկացությունները։ Մտածեք հրաշքների մասին։ Հոլիվուդը մեզ ստիպում է հավատալ, որ հրաշքները տեղի են ունենում որոտի ու կայծակի ուղեկցությամբ, և մինչ մենք երկնքին ենք նայում այդ տպավորիչ տեսարանների ակնկալիքով, բաց ենք թողնում իրական հրաշքը՝ մեր երեխայի աչքերում փայլող ժպիտը, նորածնի թղթանման եղունգը կամ վարդի նուրբ թերթիկը, որոնք ոչ մի մեքենա կամ մարդ չի կարող կրկնօրինակել։ Այլ կերպ ասած՝ մենք կորցնում ենք իրական հրաշքների տեսլականը, երբ այդ բառը իջեցնում ենք ֆանտազիայի մակարդակի։

Այս հանգստյան օրերին Հայ եկեղեցին նշեց Սուրբ հրեշտակապետներ Գաբրիելի և Միքայելի տոնը: «Հրեշտակ» բառը նշանակում է պատգամաբեր: Հրեշտակներն այն էակներն են, որոնք մեզ հայտնում են պատգամը: Մտածեք այն մասին, թե որքան տարբեր ձևերով ենք մենք չափազանց դրամատիզմի ենթարկել հրեշտակներին՝ Հին Կտակարանի պատկերներից մինչև եկեղեցական սրբապատկերներ, վիտրաժներ և մինչև հոլիվուդյան կերպարները՝ թևերով, քնարներով, աղեղներով, սպիտակ զգեստներով ու լուսապսակներով: Արդյունքում նրանք դառնում են ֆանտաստիկ կերպարներ, իսկ նրանց իրական նպատակն ու պատգամը մոռացվում են:

Մեր մտքում պահապան հրեշտակների պատկերներ ունենք, և, անշուշտ, Սուրբ Վալենտինի օրը մենք փոխանակում ենք բացիկներ ու քաղցրավենիք՝ այդ սրամիտ փոքրիկ հրեշտակների՝ քերովբեների պատկերներով, և մենք հիանում ենք ու մեզ լավ ենք զգում։ Պատկերավորումը կարևոր է։

Բայց հրեշտակը պարզապես պատգամաբեր է։ Հրեշտակն ուղարկվեց Մարիամին՝ հայտնելու, որ նա հղի է Սուրբ Հոգուց։ Այն գիշեր, երբ Հիսուսը ծնվեց, հրեշտակները պատգամ բերեցին. «Խաղաղություն երկրի վրա, բարեհաճություն մարդկանց միջև»։ Այսքանը։ Այն այդքան պարզ էր։ Քրիստոնեության պատգամը միշտ էլ այդպիսին է եղել։ Պատգամը կրողը չի կարող ավելի բարդ լինել, քան հենց ինքը՝ պատգամը։

Հրեշտակներին մեծարելիս հիշեք պատգամաբերի պարզությունը՝ նրա, ով պատիվ ունի լուր, մի պատգամ փոխանցելու մեկ ուրիշին։ Թող որ մենք ոգեշնչվենք դառնալու հավատքի, հույսի և սիրո պատգամաբերներ, ինչպես հրեշտակներն են։ Իսկ հիմա նայեք ձեր շուրջը՝ ՈՉ ԹԵ ՎԵՐ, այլ ձեր շուրջը, որպեսզի փնտրեք ու գտնեք գեղեցկությունը հենց այստեղ, և գտնեք կապը մեր բոլորի միջև։ Չէ՞ որ Հիսուսը մեզ ասում է. «Աստծո արքայությունը չի գալիս տեսանելի կերպով. և չեն ասելու՝ «Ահա՛ այստեղ» կամ «Ահա՛ այնտեղ». որովհետև ահա՛ Աստծո արքայությունը ձեր ներսում է»։