Ադվենտ 15-50. Կանանց համար

Գալստյան 50 օրերից 15-րդ օրը. Կանանց համար

Նախորդ հանդիպումների ընթացքում մենք սովորեցինք, որ անհրաժեշտ է վերահսկել մեր կյանքը՝ ինչպես հոգեպես ու հոգևոր, այնպես էլ ֆիզիկապես։ Անդրադառնալով սպանությանն ու շնությանը՝ Հիսուսը տարանջատեց մտքերը գործողություններից։ Մեր ցանկությունները կամ կրքերը վերահսկելիս մենք հասկանում ենք մեր ֆիզիկական մղումները կառուցակարգելու անհրաժեշտությունը։ Ամուսնությունը այն միջոցն է, որով մենք վերահսկում ենք մեր ուժերը, և կարելի է ենթադրել, որ Հիսուսի հաջորդ խոսքը կլինի ամուսնության սրբության մասին։ Իրականում, այն հենց այդ մասին է, թեև մի փոքր անուղղակի ձևով։ Հիսուսը հաջորդիվ խոսում է ամուսնալուծության մասին։

Խոսքը վերաբերում է Մատթեոս 5:31-32 հատվածներին. «Ասուեցաւ. Ով որ արձակէ զկին իւր, տացէ նմա թուղթ արձակման։ Այլ ես ասեմ ձեզ, եթէ ամենայն որ արձակէ զկին իւր՝ առանց բանից պոռնկութեան, առնէ զնա շնալ, և որ զարձակեալն առնէ՝ շնայ»։

Այս հատվածը շնության վերաբերյալ Նրա պատվիրանին կից հավելում է, եթե ոչ այլ ինչ, ապա գոնե կանանց առաքինությունը պաշտպանելու համար, ինչը մենք այսօր կարող ենք անվանել կանանց իրավունքներ։ Հիսուսի ժամանակներում կանայք շատ իրավունքներ չունեին. իրականում նրանց հաշվի չէին առնում, եթե նրանք ամուսնացած չէին կամ որդիներ չունեին։ Այս հատվածը շնության պատվիրանին ավելացնելով՝ Հիսուսը պաշտպանում է նրանց իրավունքները, ովքեր պաշտպանող չունեին։ Ավետարանների ողջ ընթացքում Հիսուսն անդրադառնում է այրիների և կանանց ծանր վիճակին։ Այսօրվա հատվածում՝ առանց նախապես ամուսնության մասին խոսելու ամուսնալուծությանը անդրադառնալով, Հիսուսը կրկին դառնում է անձայնների պաշտպանը։

Ինչպես ավելի վաղ նշեցի, ամուսնության մասին Նրա պատգամը փոխանցվում է ամուսնալուծության վերաբերյալ մեկնաբանության միջոցով, և ավելի կարևոր է այն հանձնառությունը, որ տղամարդը ստանձնում է իր կնոջ հանդեպ։ Սա ևս մեկ նշում է մեր Գալստյան խորհրդածությունների օրագրի համար։

Աղոթենք Սուրբ Ներսես Շնորհալու աղոթքի 16-րդ ժամից. Ով Աստուած իմ, որ բանաս զձեռն քո և լցուցանես զամենայն կենդանեօք զկամս քո, քեզ յանձն առնեմ զանձն իմ. դու հոգա և մատակարարեա պիտոյից մարմնոյ և հոգւոյ իմոյ յայսմհետէ մինչև յաւիտեան։ Ողորմեա արարածոց քոց և ինձ՝ մեղաւորիս։ Ամէն։

Շապիկ՝ Envato Elements