Գալուստի 13/14-րդ օր. Ոչ թե մեղքի պատասխան

Գալուստի այս շաբաթավերջին Հայ Եկեղեցին մեզ ուղղորդում է դեպի Սուրբ Ղուկասի ավետարանի 13-րդ գլուխը, որտեղ Հիսուսը բացատրում է, որ աղետը կամ չարիքը տեղի չեն ունենում մեր մեղանչելու պատճառով։ Հիսուսը հիշատակում է երկու դեպք, որոնք իրեն ունկնդրողների ընդհանուր պատմության մասն էին կազմում, ինչպես մեզ համար կլիներ «9/11»-ի ահաբեկչական հարձակումը և երկվորյակ աշտարակների փլուզումը։ 9/11-ը մեր վերջին պատմության մի մասն է։ Այլ կերպ ասած՝ այդ ողբերգությունների մանրամասները կարևոր չեն. Հիսուսն օգտագործում է դրանք որպես օրինակ՝ մատնանշելու անմեղ մարդկանց պատուհասող չարիքը, քանի որ բոլոր նրանք, ում հետ նա խոսում էր, գիտեին այդ լուրերի մասին։ Առաջինը գալիլեացիների պատմությունն էր, որոնք Տիրոջը սրբազան ընծա էին մատուցել, որն անարգվել էր հռոմեական կուսակալ Պիղատոսի կողմից։ Երկրորդ դեպքը աշտարակի աղետն էր, որը փլվել և սպանել էր 18 մարդու։ Այս ողբերգությունների զոհերի վերաբերյալ Հիսուսն ասում է. «Կարծո՞ւմ եք, որ նրանք ավելի մեղավոր էին, քան Երուսաղեմում բնակվող մյուս բոլոր մարդիկ։ Ասում եմ ձեզ՝ ոչ։ Բայց եթե չապաշխարեք, դուք էլ բոլորդ նույնպես կկորչեք»։

Ուսումնասիրելով Հիսուսի էական ուսմունքները, որոնք ամփոփված են Լեռան քարոզում, մենք հիշեցնում ենք ինքներս մեզ, որ մեր գործողությունները չեն, որ աղետ կամ անեծք են բերում։ Ինչպես շատերն են հավատում այսօր, այնպես էլ Հիսուսի ժամանակներում, երբ չարիքը պատուհասում էր մարդկանց, հատկապես՝ թվացյալ անմեղներին, շատերը կարծում էին, թե դա Աստծո բարկությունն է՝ ուղղված նրանց մեղքերին։ Ինչպես ուսումնասիրել ենք անցած մի քանի շաբաթների ընթացքում և շարունակելու ենք ուսումնասիրել Աստվածահայտնության մեր ուղու վրա, մեղքից ոչ ոք զերծ չէ։ Լեռան քարոզի այսօրվա ընդմիջումը Հիսուսի կողմից կարևոր հիշեցում է այն մասին, որ Աստված ողբերգություն չի բերում մարդկանց վրա, և առավել ևս՝ ոչ ի պատասխան մեր մեղքերի։

«Կարծո՞ւմ եք, որ նրանք ավելի մեղավոր էին, քան Երուսաղեմում բնակվող մյուս բոլոր մարդիկ։ Ասում եմ ձեզ՝ ոչ։ Բայց եթե չապաշխարեք, դուք էլ բոլորդ նույնպես կկորչեք», - ասում է մեր Տերը։

Աղոթենք Սուրբ Ներսես Շնորհալու աղոթքի 15-րդ ժամից. «Քրիստոս, ամենքի պահապան, Քո աջը թող պահպանի և հովանի լինի ինձ օր ու գիշեր, տանը և ճանապարհին, քնած և արթուն ժամանակ, որպեսզի չսայթաքեմ։ Ողորմիր ինձ, Քո բոլոր արարածներին և ինձ՝ մեղավորիս։ Ամեն»։