Հարցեր տալը թույլատրելի է

Արմոդոքսիան այսօր. հարցեր տալը թույլատրելի է

Արագ մտածեք. ո՞վ էր Ձեր սիրելի ուսուցիչը դպրոցում։ Ո՞ւմից եք Դուք ամենաշատը սովորել։ Հավանաբար նրանք այն դասախոսները չէին, որոնք պարզապես նստեցնում էին Ձեզ, գիտելիքներ լցնում Ձեր ուղեղի մեջ և 50 րոպե անց ազատ արձակում։ Համարձակվում եմ ասել, որ լավագույն ուսուցիչները կամ դասախոսները բնավ էլ դասախոսություններ կարդացողները չէին, այլ նրանք, ովքեր Ձեզ ներգրավում էին երկխոսության մեջ։ Այն ուսուցիչը, որը մարտահրավեր էր նետում՝ տրամադրելով նյութ խորհելու, զարմանալու, հարցեր տալու և սեփական եզրակացությունները ձևավորելու համար, հենց նա էր, որ փոխանցում էր գիտելիք և, գուցե, նաև իմաստություն։

Հարցեր տալը սովորելու միջոց է։ Հիսուսը սովորեցնում էր հարցեր առաջադրելով, իր աշակերտներին ներգրավելով մտածողության գործընթացի մեջ, որի միջոցով նրանք ճանաչում էին Նրան, ճանաչում Նրա սերը իրենց հանդեպ և Երկնքի Արքայության վեհ ճշմարտությունները։ Նույնիսկ Նրա ուսմունքի գագաթնակետը՝ Լեռան քարոզը (Մատթեոս 5-7), որը ներկայացված է որպես «դասախոսություն», իրականում հարց ու պատասխանների շարք է, որտեղ հայտնի փաստերին հաջորդում են ուսուցողական պատասխաններ։ «Լսել եք, որ ասվել է...»,- ասում էր Հիսուսը՝ նշելով հայտնի մի բան, ապա պատասխանում իր դասով՝ խորհրդածության և ի վերջո՝ ուսուցման համար։

Որպես սիրող և հոգատար Աստված՝ Նա հրավիրում է Ձեզ գալ Իր մոտ սիրով և Նրան ավելի մոտիկից ճանաչելու ձգտումով։ Մենք բոլորս տարբեր ենք, ունենք տարբեր դաստիարակություն, բախվում ենք տարբեր երկընտրանքների ու ուրախությունների։ Բնական է, որ Դուք հարցեր կունենաք։ Ինչո՞ւ չարիք։ Ինչո՞ւ ցավ։ Որտե՞ղ է ուրախությունը։ Ինչպե՞ս գտնել երկինքը։ Յուրաքանչյուրիս Նա հնարավորություն է տալիս. «Խնդրեցե՛ք, և կտրվի ձեզ, փնտրեցե՛ք և կգտնեք, թակեցե՛ք և կբացվի ձեր առաջ։ Որովհետև ամեն ոք, ով խնդրում է՝ ստանում է, ով փնտրում է՝ գտնում է, և ով թակում է՝ նրա առաջ բացվում է»։

Այո՛, մտածելը և հարցեր տալը թույլատրելի են։

Այսօր մենք աղոթում ենք Սաղմոս 4-ը. «Իմ արդարության Աստվա՛ծ, երբ կանչում եմ, պատասխանի՛ր ինձ։ Նեղության մեջ Դու ինձ տարածություն տվեցիր։ Ողորմի՛ր ինձ և լսի՛ր իմ աղոթքը։ Խաղաղությամբ կպառկեմ ու կքնեմ, որովհետև միայն Դու, Տե՛ր, ինձ ապահով կբնակեցնես։ Ամեն։»