Արմոդոքսիան այսօր. Նուրբ մոլորակ

Այսօր մենք նշում ենք Ուիլյամ Անդերսի մահը՝ 1960-ականների ՆԱՍԱ-ի Ապոլոն տիեզերագնացներից մեկի, այն ընտրյալ խմբի անդամներից մեկի, որոնց ջանքերի շնորհիվ 1969 թվականին հնարավոր դարձավ լուսնէջքը։

Ուիլյամ Անդերսը թռչել է «Ապոլոն 8»-ով, որը Երկրի ուղեծրից դուրս եկած և մեկ այլ երկնային մարմնի՝ այս դեպքում մեր մոլորակի ամենամոտ հարևանի՝ Լուսնի ուղեծիր մուտք գործած առաջին մարդածին օբյեկտն էր։ «Ապոլոն 8» առաքելության ընթացքում տիեզերագնացներին հանձնարարված էր պտտվել Լուսնի շուրջ, դիտարկել լուսնային մակերևույթը, գրանցել իրենց բացահայտումները և վերադառնալ Երկիր։

Լուսնի մակերևույթը կազմված է խառնարաններից և փոշուց։ Լանդշաֆտը լուսանկարելու համար նրանք օգտագործում էին սև ու սպիտակ ժապավեն։

Մինչ տիեզերագնացների ուշադրությունը կենտրոնացած էր Լուսնի վրա, լուսանկարներ անելու ընթացքում Ուիլյամ Անդերսն էր այն մարդը, որը շրջեց գլուխը տիեզերանավի ներսում և նկատեց մի գեղեցիկ կապույտ մոլորակ, որը հայտնվում էր հորիզոնից այն կողմ։ Նա արագորեն գունավոր ժապավեն տեղադրեց իր տեսախցիկի մեջ և սկսեց լուսանկարել պատուհանից դուրս երևացող տեսարանը՝ օգտագործելով տարբեր լուսաբացվածքներ՝ փոխհատուցելու համար այս երբևէ չտեսնված իրադարձության ստեղծած անորոշությունը։ Դա Երկիրն էր, որը բարձրանում էր Լուսնի հորիզոնից վեր։ Սա առաջին դեպքն էր, երբ որևէ մարդկային էակ ականատես էր լինում երկրածագի։

Անդերսը հետագայում ասաց. «Մենք այսքան ճանապարհ անցանք Լուսինը հետազոտելու համար, բայց հայտնաբերեցինք Երկիրը»։

Իրադարձությունը տեղի է ունեցել 1968 թվականի Սուրբ Ծննդյան նախօրեին։ Պատկերը ռադիոկապով փոխանցվել է Երկիր, որպեսզի բոլորը տեսնեն մեր մոլորակը Ուիլյամ Անդերսի աչքերով և նրա գլուխը շրջելու պատահական իրադարձության շնորհիվ։ «Ապոլոն 8»-ի անձնակազմը՝ Բիլ Անդերսը, Ջիմ Լովելը և Ֆրենկ Բորմանը, աշխարհին որպես Սուրբ Ծննդյան նվեր ընթերցեցին Արարչագործության պատմությունը։ Ծննդոց գրքի 1-ին գլուխը. «Ի սկզբանե Աստված ստեղծեց երկինքն ու երկիրը…»

Այդ օրը, այդ լուսանկարը և դրա փոխանցած ուղերձը փոխեցին մարդկանց վերաբերմունքը մեր մոլորակի նկատմամբ։ Այդ լուսանկարն այժմ խորհրդանշական է և շարունակում է հիշեցնել, թե որքան նուրբ է մեր գոյությունը մեր այս մոլորակի վրա։

Երբեմն կյանքի մասին մեր պատկերացումները թարմացնելու համար բավական է պարզապես շրջել գլուխը և կյանքին նայել մեկ այլ պատուհանից, մեկ այլ անկյունից։ Երբ Հիսուսը չարին ասում է «դարձրու մյուս այտդ», Նա մեզ խնդրում է տեսնել մեր պատուհանից դուրս գտնվող գեղեցիկ գույները, նույնիսկ երբ մենք կենտրոնացած ենք թվացյալ սև ու սպիտակ աշխարհի վրա։ Իրականում մարդկության համար մարտահրավերը շրջվելն է, վերաիմաստավորել մի աշխարհ, որտեղ չարը կարելի է հաղթահարել բարությամբ, որտեղ բռնությանը պարտադիր չէ պատասխանել բռնությամբ, որտեղ մեր փոխաբերությունները ներառում են հրդեհը հանգցնելու համար ջրի փողրակ օգտագործելը, այլ ոչ թե ավելի մեծ կրակը։

Ուիլյամ Անդերսը մահացավ 90 տարեկան հասակում։ Տիեզերանավից նրա արած լուսանկարը երբեք չի մահանա, քանի որ այն հայացք է դեպի այն բարությունը, որը Աստված կիսեց մեզ հետ՝ Իր արարչագործության։ Թող Աստված հանգստացնի Ուիլյամ Անդերսի հոգին։

Մենք ավարտում ենք մի աղոթքով, որը նույն տիեզերանավում գտնվող մյուս տիեզերագնացներից մեկը՝ Ֆրենկ Բորմանը, աղոթեց տիեզերքից Սուրբ Ծննդյան այդ օրը. «Տո՛ւր մեզ, ո՛վ Աստված, այն տեսլականը, որը կարող է տեսնել Քո սերը աշխարհում՝ չնայած մարդկային ձախողումներին։ Տո՛ւր մեզ հավատք՝ վստահելու Քո բարությանը՝ չնայած մեր տգիտությանն ու թուլությանը։ Տո՛ւր մեզ գիտելիք, որպեսզի շարունակենք աղոթել հասկացող սրտերով»։ Ամեն։

Շապիկ՝ Լուսնածագ, 1968 ՆԱՍԱ (Ապոլոն 8)