Դրական քայլեր

Արմոդոքսին այսօր

Դրական քայլեր

Մեր Գալստյան ճամփորդությունը սկսեցինք «Անմիտ հարուստի» հետ հանդիպումով, որը Հիսուսի առակներից մեկի (Ղուկաս 12) կերպարն է։ Իմաստով՝ նա այն է, ինչ մենք կարող ենք անվանել բացասական հերոս, այլ կերպ ասած՝ նա պատմության գլխավոր կերպարն է, որը սովորեցնում է, թե ինչ չպետք է լինել։ Բացասական հերոսները չափազանց տարածված են ինչպես կրոնական պատմություններում, այնպես էլ իրական կյանքում։ Քաղաքականության մեջ ոմանք կարող են քվեարկել թեկնածուի օգտին, քանի որ նա չէ մյուս թեկնածուն։ Գործարար աշխարհում ոմանք կարող են ընտրել առևտուր անել մի ֆիրմայի հետ, քանի որ այն չէ մյուս ընկերությունը։ Այդպես վարվելով՝ Դուք ավելի շատ կենտրոնանում եք մեկի բացասական հատկանիշների վրա՝ մյուսի դրական հատկանիշների փոխարեն, և արդյունքում սկսում եք Ձեր կրոնական պարտավորություններն ու պատասխանատվությունները դիտարկել այն տեսանկյունից, թե ինչ չպետք է անել, այլ ոչ թե ինչ պետք է անել։

Գալստյան ճամփորդությունը ժամանակ է, որպեսզի Դուք պատրաստվեք Սուրբ Ծննդյան պատգամին։ Այս ճամփորդության ավարտին Ձեզ սպասում է Քրիստոսը՝ որպես Ընծա, որպես Լույս, որպես Փրկիչ։ Կյանքի ամենաբարձր և ամենադրական դրսևորումը սպասում է Ձեզ, և Դուք կարձագանքեք այդ ընծային։ Այդ արձագանքը շարժում է, Ձեր կյանքում առաջընթացի մի քայլ։

Վերջին օրերին մենք տարբեր տեսանկյուններից դիտարկեցինք Անմիտ հարուստի առակը։ Եթե վերջում անկեղծ լինեք Ձեր հանդեպ, ապա կբացահայտեք, որ Անմիտ հարուստն իրականում հենց Դուք եք։ Անմիտ հարուստի նման՝ յուրաքանչյուրս կլանված ենք հարստությամբ և ունեցվածքով, որոնք փայլեցված են մեր էգոյով, մեր ցանկություններով ու ձգտումներով։ Եվ այս ամենը խանգարում է Ձեզ զգալ Աստծո լիությունը և, հետևաբար, կյանքի գեղեցկությունը։

Հիսուսն առակը նախորդում է այս զգուշացմամբ. «Զգուշացե՛ք և պահպանե՛ք ձեզ ամեն տեսակ ագահությունից, որովհետև մարդու կյանքը նրա ունեցածի առատության մեջ չէ»։ Սա սրտին մոտ ընդունելով՝ Գալստյան ճամփորդության առաջին մասը Ձեր կյանքում կարևոր և նշանակալի իրերի գույքագրումն է, և նախաձեռնողաբար, այսինքն՝ գործելով, պետք է տոնեք Ձեր կյանքում կարևոր այն բաների առատությունը, ինչպիսիք են Ձեր հարաբերությունները, ուրիշների հանդեպ ունեցած սերը և Ձեզ շրջապատող կյանքի գեղեցկությունը։ Սրանք պարզ գանձեր են, որոնք հասանելի են բոլորին։

Այսօրվա աղոթքի համար կցանկանայի Ձեզ հետ կիսվել Շնորհալու 9-րդ ժամի աղոթքի մի տարբերակով՝ գործելու վրա շեշտադրմամբ. Ամենախնամ Տեր, ինձ տուր տեսողության պարզություն՝ շրջապատիս գեղեցկությունը տեսնելու, լսողության սրություն՝ բնության երաժշտությունը լսելու, քաջություն՝ ճշմարտության խոսքեր ասելու, սրտի պարզություն՝ բարին մտածելու, ձեռքերիս՝ ուժ՝ արդարության համար աշխատելու, և ոտքերիս՝ ուղիղ ճանապարհներով քայլելու։ Առաջնորդի՛ր իմ շարժումները, որպեսզի դրանք լինեն Քո բոլոր պատվիրաններին համապատասխան։ Ամեն։