Armodoxy-ն այսօր. Կրոնական խարդախություններ և ամենաթույլ օղակը

Մենք բոլորս արդեն ծանոթ ենք՝ չափազանց ծանոթ՝ «խաբեություն» բառին։ Մենք լսել ենք համացանցային, ֆինանսական, էլեկտրոնային փոստի և հեռախոսային խաբեությունների մասին և փորձում ենք որոշակի զգուշություն ցուցաբերել դրանց դեմ։ Բանկերը, ֆինանսական հաստատությունները և նույնիսկ առողջապահական հիմնադրամները նախազգուշացումներ են հրապարակում խաբեության զոհ դառնալու վտանգի վերաբերյալ։ Սակայն երբ խոսքը վերաբերում է կրոնական խաբեություններին, մենք վստահ ենք, որ դա մեզ հետ երբեք չի կարող պատահել։ Ի վերջո, մենք մտածում ենք՝ ես քրիստոնյա եմ, ծնվել և մեծացել եմ որպես քրիստոնյա, և գիտեմ, թե ինչին եմ հավատում։ Այդ պնդման մեջ էլ հենց գտնվում է մեր պաշտպանության ամենաթույլ օղակը կրոնական խաբեություններից։

Այս օրերին ամեն ոք իրեն իրավունք է վերապահում հանդես գալ որպես Քրիստոսի, քրիստոնեական հավատքի և քրիստոնեության վերաբերյալ բոլոր հարցերի գիտակ։ Բավական է սոցիալական ցանցերում բարձրաձայն մեջբերել Աստվածաշնչի մի քանի համար, և յուրաքանչյուր ոք կարող է հարթակի շնորհիվ որոշակի հեղինակությամբ հանդես գալ։ Կեղծ լուրերը պիտակավորվում են, սակայն կրոնի, հատկապես՝ քրիստոնեության դեպքում, ամեն ինչ թույլատրելի է։ Պատերազմների և դրանց մասին խոսակցությունների սրման հետ մեկտեղ՝ ասպարեզը բաց է աշխարհի վերջի մասին կանխատեսումների համար, որոնք կապված են Արմագեդոն կոչվող ճակատամարտի հետ։

Քանի որ կրոնը անձնական հարց է, մարդիկ իրականում չեն հետաքրքրվում դրա նախապատմությամբ։ Օրինակ՝ Հայ եկեղեցին, լինելով Առաքելական, այսինքն՝ առաքյալների ժամանակներից եկող, յուրահատուկ տեղ ունի քրիստոնեական աշխարհում և հեղինակությամբ է խոսում քրիստոնեական հասկացությունների ու դոգմաների մասին։ Այնուամենայնիվ, մարդկանց համար ավելի հեշտ է հավատալ այն ամենին, ինչին ցանկանում են, որքան էլ դա տարօրինակ թվա, քան ինքնակրթվելը։

Ուստի, ձեզ անհայտ որոշ տեղեկություններ փոխանցելու նպատակով, ահա մի քանի կետ, որոնք հարկավոր է հաշվի առնել, երբ կարդում եք Քրիստոսի և քրիստոնեության անունից արվող սարսափազդու կանխատեսումները։

1 Հին Կտակարանը փրկարար չէ։ Հիսուս Քրիստոս օրենքի և մարգարեների կատարումն է։

2 Հիսուս Աստծո Որդին է, և հետևաբար Նրա ազգությունը վեր է ազգության վերաբերյալ մեր ըմբռնումից։ Նա հավասարապես պատկանում է բոլորին և բոլոր ազգային խմբերին։

3 Իսրայել բառը նշանակում է «Աստծո ժողովուրդ»։ Հայ Եկեղեցում մկրտությունից հետո մենք անձին հռչակում ենք «Նոր Իսրայելի» անդամ, ինչը չի նշանակում, որ նա պատկանում է Մերձավոր Արևելքի հրեական պետությանը։

4 Հիսուս կվերադառնա։ Նրա վերադարձը մոտ է, բայց այն մոտ է համարվում դեռևս 1-ին դարից։ Այդ իսկ պատճառով Հիսուս ասում է. «Իսկ այն օրվա և ժամի մասին ոչ ոք չգիտի, ոչ երկնքի հրեշտակները և ոչ էլ Որդին, այլ միայն Հայրը»։ (Մատթեոս 24:36)

5 Հիսուսի վերադարձի վայրը բացահայտված չէ։ Դա Նրա գործն է։ Նա մեզ խնդրում է սիրել և հոգ տանել, այլ ոչ թե գուշակել վայրերը։ Ինչ էլ որ կարդացած կամ լսած լինեք, եթե Հիսուսը որոշի վերադառնալ Պուերտո Ռիկո կամ Հայաստան, Դուք կարող եք վկայակոչել Աստվածաշնչի բոլոր էջերը և Ձեր լսած բոլոր քարոզիչներին, Նա պարտավոր չէ հետևել այդ կանոններին։ Կրկնում եմ՝ Նա մեզ խնդրում է սիրել և հոգ տանել, այլ ոչ թե գուշակել վայրերը։

6 Յուրաքանչյուր ոք, ով կանխատեսում է Հիսուսի վերադարձը կոնկրետ օր կամ վայր, խարդախությամբ է զբաղվում։

7 Հայտնության գիրքը գրվել է 12 աշակերտներից մեկի՝ Սուրբ Հովհաննեսի կողմից։ Նա բանտարկված էր կղզում և գրում էր ժամանակի քրիստոնյաներին։ Նա գրել է ծածկագրով, որը ժամանակի մարդիկ կհասկանային։ Պատգամը պարզ է. համբերեք տառապանքներին և հալածանքներին, Աստծո հաղթանակը վերջում երաշխավորված է։

8 Թե ով կգնա Երկինք, Աստծո գործն է։ Մեր գործը միմյանց սիրելն ու հոգ տանելն է, իսկ մնացածը թողնել Աստծուն։ Մեր աղոթքը՝ Ձեր աղոթքը, պետք է լինի. Տե՛ր, ողորմեա։

Սրանք ընդամենը մի քանի կետեր են, որոնք ցանկացա կիսել Ձեզ հետ՝ հաշվի առնելով քրիստոնեության անունից տարածվող կրոնական ապատեղեկատվության ողջ ծավալը։ Կան շատ ավելին, և հենց այդ պատճառով մենք ստեղծեցինք Epostle-ը՝ հույս ունենալով, որ Դուք կհետևեք հնագույն ուսմունքներին։

Աղոթե՛ք այն աղոթքը, որը սովորեցրեց մեզ մեր Տեր Հիսուսը. Հայր մեր, որ երկինս ես, սուրբ եղիցի անուն քո. եկեսցե արքայություն քո. եղիցին կամք քո որպես երկինս և երկրի. զհաց մեր հանապազորդ տուր մեզ այսօր. և թող մեզ զպարտիս մեր, որպես և մեք թողումք մերոց պարտապանաց. և մի տանիր զմեզ ի փորձություն, այլ փրկեա՛ զմեզ ի չարէ։ Զի քո է արքայություն և զորություն և փառք հավիտյանս. Ամեն։