Թզենու տերևի գրաքննությո՞ւն

Արմոդոքսիան այսօր. Գրաքննություն

Գրաքննությունը պարբերաբար հայտնվում է լրատվական օրակարգում: Այն Միացյալ Նահանգներում կարևոր տեղ է զբաղեցնում հիմնականում այն պատճառով, որ սահմանադրական երաշխիքներն արգելում են խոսքի ազատության սահմանափակումը: Գրաքննությունը դիտարկվում է որպես կենտրոնական իշխանության՝ այսինքն՝ պետության կողմից կայացված որոշում այն մասին, թե ինչը պետք է կարդալ, լսել, տեսնել, գրել կամ ասել, իսկ ինչը՝ ոչ: Այս որոշումը կայացվում է որևէ անձի կամ խմբի արժեքների հիման վրա:

Ինչ վերաբերում է կենտրոնական իշխանություններին, ապա Աստծուց ավելի կենտրոնական և հեղինակավոր ոչինչ չկա, իսկ Աստված գրաքննություն չի իրականացնում: Նա նաև չի պահանջում, որ մենք թզենու տերևներից գոգնոցներ պատրաստենք (տե՛ս Ծննդոց 3): Հիսուսի ուսմունքներում Նա մեզ կոչ է անում անձնական պատասխանատվության: Նա կրկին ու կրկին պնդում է, որ մենք պատասխանատու ենք մեր կատարած գործողությունների համար, հետևաբար գրաքննությունը՝ որոշակի բառերի կամ բովանդակության հասանելիությունն արգելելու հրամանը, քրիստոնեության մաս չէ: Դուք ազատ եք գործելու այնպես, ինչպես կամենում եք՝ գիտակցելով, որ Ձեր գործողությունների համար կան հետևանքներ, նույնիսկ՝ վերջնական դատաստան: Վերջին դատաստանի ամբողջ գաղափարը՝ Ձեր կյանքի ընդհանուր արդյունքով դատվելը, հիմնված է այն նախադրյալի վրա, որ Դուք ազատ եք ընտրելու՝ ինչպես վարվել կամ այլ կերպ վարվել:

Հաճախ, կարգուկանոն պահպանելու և բարոյական նորմերը չխախտելու մոլուցքով տարված՝ մարդիկ ստեղծում են կանոններ ու կարգադրություններ՝ հասարակությանը, և հատկապես նրանց, ովքեր ի վիճակի չեն պաշտպանվելու, օրինակ՝ երեխաներին, պաշտպանելու համար:

Ուրեմն ո՞րն է գրաքննության պատասխանը: Ինչպե՞ս եք Դուք կանխում վատ գաղափարների տարածումը:

Մտածեք այն մասին, թե ինչպես եք ստանում լուրերը, զվարճանում, խորհրդածում արվեստի շուրջ կամ վայելում երաժշտությունը: Մտածեք, թե ինչպես եք մասնակցում Ձեր հավատքին և հեռու մնում Ձեզ համար անընդունելի համոզմունքներից: Դուք ունեք հեռանալու հնարավորություն: Դուք կարող եք անջատել հեռուստացույցը, սահեցնել էջը՝ այն անտեսանելի դարձնելու համար, անջատել սարքը, հրաժարվել լրատվամիջոցներից կամ պարզապես փոխել ալիքը: Ինչպես հենց հիմա՝ Դուք ունեք այս ուղերձը լսելու կամ անտեսելու ընտրության հնարավորություն: Այլ կերպ ասած՝ Դուք կարող եք կայացնել այդ որոշումները: Աղոթեք, երկխոսեք, կիսվեք Ձեր մտքերով և գործեք: Դա Ձեր որոշումն է: Սա Հիսուսի կոչն է պատասխանատու կյանքի համար: