Համբերատար սպասում. 40 օրից 16-րդ օրը
Armodoxy այսօրվա համար. Համբերատար սպասում – Մեծ պահքի 16-րդ օրը
Շարունակելով Անառակ որդու առակի թեման՝ այսօր անդրադառնում ենք հոր կերպարին, որը համբերատարությամբ սպասում է իր զավակի տունդարձին։
Նախ տեսնում ենք, որ հայրը տալիս է առանց սահմանափակումների կամ պայմանների։ Որդին ասում է. «Տո՛ւր ինձ իմ հասանելիք ժառանգությունը, որպեսզի կարողանամ գնալ, հաստատվել և սկսել իմ կյանքը»։ Հայրը, լինելով իմաստուն մարդ, անշուշտ հասկանում է, որ որդին կարող է կորցնել կամ վատնել գումարը, սակայն չի վիճում նրա հետ։ Նա բաց է թողնում նրան։ Թեև նա գիտի ավելին, միևնույն է, ընդունում է, որ զավակի կյանքը նրանն է, և նա պետք է ապրի այն։ Այո՛, սխալներ գործելը կարող է ցավալի լինել, բայց հենց այդ սխալների միջոցով են զավակները սովորում։
Հորը երկրորդ անգամ տեսնում ենք, երբ որդին վերադառնում է։ Հիշե՛ք, որ որդին զղջում է, կամ գոնե հասկանում է, որ կարող է ավելի լավ կյանք ունենալ՝ վերադառնալով հոր տուն։ Անկախ որդու մտադրություններից՝ հայրը, տեսնելով նրան տունդարձի ճանապարհին, վազում է ընդառաջ և նույնիսկ թույլ չի տալիս, որ որդին ներողություն խնդրի։ Նա հպարտության խաղ չի խաղում։ Նա հիմարաբար չի ասում. «Սպասեմ տեսնեմ՝ ինչ ունի ասելու»։ Նա այնտեղ է՝ իր որդուն ընդունելու համար։ Նա չի ասում. «Ես քեզ ասել էի։ Գիտեի, որ վերադառնալու ես»։ Փոխարենը՝ նա ճանաչում է իր սիրելիին՝ այն որդուն, որի մասին հոգ էր տարել, որին լույս աշխարհ էր բերել և մեծացրել, վերադարձել էր։ Որքա՜ն ոգևորված պետք է լինի նա։ Իհարկե, նա վազում է որդու մոտ և գրկում նրան։
Առակի հայրը մեր Երկնավոր Հոր արտահայտությունն է։ Հիսուսը մեզ ցույց է տալիս Աստծո անպայմանական սիրո մի պատկեր։ Երկնքում Աստված սպասում է, որ մենք տուն վերադառնանք, և երբ մենք իսկապես հետ ենք դառնում, Նա չի սպասում, որ մենք աղաչենք՝ Իր Արքայություն վերադառնալու համար։ Նա համբերատար սպասում է, որ մենք կատարենք այդ առաջին քայլը դեպի Իրեն։ Հենց այդ ժամանակ է, որ Նա մոտենում է մեզ և լիովին գրկում։ Նա ընդունում է մեզ՝ պարգևելով Կյանք։ Աստված ընդունում է մեզ որպես Իր Արքայության ճշմարիտ զավակների։ Մեզ ընդունելը Նրա կողմից հաստատված փաստ է։ Պահանջն այն է, որ մենք ասենք. «Այո՛, ես մեղանչել եմ։ Ես սխալ ճանապարհով եմ գնացել։ Ես վատնել եմ այն, ինչ Աստված տվել է ինձ։ Ես ուզում եմ խաղաղություն գտնել։ Ես ուզում եմ գտնել այն սերը, որի մեջ Աստված ստեղծել է ինձ»։ Աստված սպասում է, որ մենք ասենք. «Ես պատրաստ եմ», որից հետո ամեն ինչ իր տեղն է ընկնում։
Ձեր այսօրվա բարեգործությունը Անառակ որդու հոր ոգով է՝ ընդունե՛ք նրանց, ովքեր մոլորվել են։ Արդյո՞ք նրանք փնտրում են վերադառնալու ուղին, և որքանո՞վ եք Դուք պատրաստ ներելու։ Այսօր պահե՛ք պահք այն ամենից, ինչը խանգարում է Ձեզ բացել Ձեր սրտի դուռը։
Այսօրվա բաղադրատոմսը բալով և ընկույզով քաղցրավենիքն է, բաղադրատոմսի հղումը ստորև է։
Մենք աղոթում ենք Սուրբ Գրիգոր Նարեկացու խոսքերով. «Տե՛ր, պատրաստի՛ր մեզ համար պատվավոր օթևաններ՝ Քո երկնային Գառանը հաղորդակից լինելու համար, որպեսզի ճաշակենք նոր փրկության կենարար մանանան և խուսափենք դատապարտության պատիժներից։ Թող մեր հայհոյանքը մաքրվի մաքրագործող կրակով, ինչպես մարգարեն պատմեց զոհասեղանին դրված ունելուի կենդանի ածխի մասին, որպեսզի Քո ողորմությունը հռչակվի ամեն ինչում՝ որպես Հոր գթասրտություն, որը գրկեց անառակ որդուն հայրական ժառանգությամբ և մարմնավաճառին առաջնորդեց դեպի երկնային արքայության երանություն, ինչպես հռչակվեց Աստծո Որդու կողմից։ Ամեն»։ (Թարգմանեց՝ Թոմաս Ջ. Սամուելյանը)
Պահքի բաղադրատոմսեր սարկավագ Վարուժանի կողմից. Բաղադրատոմս 16՝ Բալով և ընկույզով քաղցրավենիք
