Թյուրիմացության մեջ հայտնված դատավորը

Արմոդոքսիան այսօր. Թյուրիմացության մեջ հայտնված դատավորը

Անիրավ դատավորի կիրակին Մեծ պահքի երրորդ կիրակին է, որն իր անունը ստացել է կասկածելի բարոյական նկարագիր ունեցող կերպարից։ Միանալով նախորդ երկու կիրակիների Անառակ որդուն և Անիրավ տնտեսին՝ այսօր Անիրավ դատավորը եզրափակում է եռերգությունը՝ կենտրոնանալով մեր աղոթական կյանքի վրա։ Հիսուսն այս առակը ներկայացնում է Ղուկասի Ավետարանի 18-րդ գլխում։

Անիրավ դատավորը մի մարդ է, ով, ինչպես Հիսուսն է բացատրում, ոչ ոքից չէր վախենում՝ ո՛չ Աստծուց, ո՛չ էլ մարդկանցից ամաչում։ Այն քաղաքում, որտեղ նա դատավոր էր ծառայում, մի այրի կին անընդհատ գալիս էր նրա մոտ և աղաչում, որ լսի իր գործը։ Որոշ ժամանակ նա հրաժարվում էր, բայց վերջապես ինքն իրեն ասաց. «Թեպետ Աստծուց չեմ վախենում և մարդկանցից էլ չեմ ամաչում, բայց քանի որ այս այրին ինձ անհանգստացնում է, արդարություն կանեմ նրան, որպեսզի վերջում ինձ չհոգնեցնի»։ Հիսուսն իր առակը եզրափակում է ուշագրավ հայտարարությամբ։ Նա ասում է. «Լսե՛ք, թե ինչ է ասում անիրավ դատավորը։ Մի՞թե Աստված արդարություն չի անի իր ընտրյալներին, որոնք գիշեր ու ցերեկ աղաղակում են իրեն։ Մի՞թե նրանց կձգձգի։ Ասում եմ ձեզ, Նա շուտով արդարություն կանի նրանց»։

Իրոք, սա տարօրինակ պատմություն է, գոնե առաջին հայացքից։ Առաջին ընթերցմամբ կարող եք մտածել, որ Հիսուսը Աստծուն համեմատում է այս անիրավ դատավորի հետ։ Այդ զուգահեռը տանելով՝ հակված եք մտածելու, որ Աստծուն կարելի է հոգնեցնել կամ ստիպել զիջել։ Կարծես թե, եթե մենք շարունակենք կրկնվող աղոթքներ անել, Աստված ի վերջո «այո» կասի մեր կարիքներին ու ցանկություններին։ Այնպես որ, շարունակե՛ք աղոթել, եղե՛ք հաստատակամ։ Համբերատե՛ր եղեք այն այրի կնոջ պես։ Եվ վերջում Աստված կհոգնի ձեզ լսելուց և կփոխի իր որոշումը։ Պատկերացրե՛ք... եթե Նրա պատասխանը ձեզ «ոչ» էր, դուք հիմա հասել եք նրան, որ Նա փոխի այն «այո»-ի։ Որքան էլ ցանկանաք հավատալ, որ Աստծուն հեշտ է համոզել, և նույնիսկ եթե դա համահունչ է Հին Կտակարանում հանդիպող որոշ սովորույթների, դա այն չէ, ինչ Հիսուսը սովորեցրեց։

Կարդացե՛ք Ղուկասի 18-րդ գլուխը։ Այս շաբաթ մենք կանդրադառնանք աղոթքին և լեռներ տեղաշարժելու դրա զորությանը։ Մենք կկիրառենք արմոդոքսիական մոտեցում այս առակին և Հիսուսի փոխանցած պատգամին։ Մենք կհամարձակվենք հարց տալ. ինչո՞ւ աղոթել մի Աստծու, ով չի պատասխանում աղոթքներին։ Այսօր մենք սկսում ենք աղոթքի մասին ամենապարզ դասով. նախ՝ Հիսուսի խոսքերով, եթե անիրավ դատավորը, որը չէր վախենում ո՛չ Աստծուց, ո՛չ մարդուց, արդարացրեց կնոջը, որքա՜ն ավելի Ձեր հոգատար և սիրող Երկնային Հայրը հոգ կտանի Ձեր և Իր բոլոր զավակների մասին։

Մենք աղոթում ենք. Տե՛ր, սովորեցրո՛ւ ինձ վստահել Քեզ։ Ինչպես Դու սովորեցրիր մեզ, թո՛ւյլ տուր ինձ հասկանալ իմ Երկնային Հորը որպես Նրա, ով անվերջ հոգ է տանում և սիրում է ինձ ու Իր բոլոր զավակներին։ Ամեն։