Մեծ պահքի ուղևորություն, օր 8 – Դատաստան

Օր 8՝ Դատաստան

Պահքի բաղադրատոմս

Մեծ պահքի երկրորդ շաբաթը սկսելիս մենք խորհում ենք մեր զգացմունքների և դրանցից բխող գործողությունների մասին։ Այս շաբաթը մենք սկսում ենք՝ անդրադառնալով դատողության վերաբերյալ Հիսուս Քրիստոսի պատվիրանին, որը Նա տվել է Լեռան քարոզի ժամանակ։ Ընթերցում ենք Հիսուսի խոսքերը.

Մի՛ դատեք, որպեսզի չդատվեք, որովհետև ինչ դատաստանով որ դատում եք, նույնով պիտի դատվեք, և ինչ չափով որ չափում եք, նույնով պիտի չափվի ձեզ։ Ինչո՞ւ ես նայում եղբորդ աչքի շյուղին, իսկ քո աչքի գերանը չես նկատում։ Կամ ինչպե՞ս ես եղբորդ ասում՝ թո՛ղ հանեմ շյուղը քո աչքից, երբ ահա քո աչքին գերան կա։ Կեղծավոր, նա՛խ քո աչքից հանի՛ր գերանը, և այն ժամանակ պարզ կտեսնես եղբորդ աչքից շյուղը հանելու համար։» (Մատթեոս 7)

Այս շատ կարճ հատվածում մենք գտնում ենք կյանքի համար խրատական մի հզոր պատգամ։ «Մի՛ դատեք», – ասում է Հիսուսը։ Այս պատվիրանի միջոցով մենք սկսում ենք հասկանալ Աստծո տեսանկյունը։ Ինչպե՞ս է Աստված դիտարկում մեզանից յուրաքանչյուրին որպես հավաքականություն, այսինքն՝ որպես Իր զավակներ, որոնք բնակվում են այս մոլորակի վրա։

Աստծո աչքում մարդկանց միջև տարբերություններ չկան։ Չկան ռասաներ՝ մարդկանց տարանջատելու համար։ Մենք բոլորս Նրա զավակներն ենք։ Եթե մի պահ մտածեք այս մասին, կհասկանաք այն ասացվածքը, որ Աստծո աչքում բոլոր պատերազմները համարվում են քաղաքացիական պատերազմներ։ Մենք բոլորս Նրա զավակներն ենք, հետևաբար՝ ցանկացած մեկի հանդեպ հարձակումը հարձակում է Աստծո արարչագործության վրա։

Հիսուսն ասում է՝ մի՛ դատեք, որովհետև կյանքի այս ասպարեզում մենք բոլորս հավասար ենք։ Ոչ ոք իրավունք չունի դատելու մյուսին։ Հիսուսը շարունակում է հիշեցնել մեզ, որ Աստված արևը ծագեցնում է և՛ բարիների, և՛ չարերի վրա, քանի որ Նա չի տարբերակում նրանց։ Հետևաբար, եթե Աստված չի տարբերակում մարդկանց, ո՞վ ենք մենք, որ համարձակվենք մեզ ուրիշներից ավելի լավը համարել։ Ահա թե ինչու է Նա ասում՝ նախ ներս նայե՛ք, տե՛ս այն վնասները, որոնք կան ձեր կյանքում, հանի՛ր դրանք, որպեսզի կարողանաք պարզորոշ տեսնել ավելի մեծ պատկերը։ Ի վերջո, Մեծ պահքի նպատակը հենց դա է։ Սա ժամանակ է՝ 40 օր, երբ մենք ձգտում ենք հանել այդ գերանները մեր աչքերից, որպեսզի կարողանանք տեսնել կյանքի հրաշքները։ Մենք բացում ենք վարագույրը, որպեսզի կարողանանք տեսնել Աստծո արարչագործության բարիքը մեր շուրջը։ Արդյո՞ք հրաշալի չէր լինի նայել մեկ այլ մարդու աչքերի մեջ և տեսնել Աստծո արտացոլանքը։ Ի՞նչ կլիներ, եթե կարողանայինք խորապես նայել մեկ այլ մարդու հոգու մեջ և իսկապես տեսնել Աստծո ներկայությունը։ Ցանկանո՞ւմ եք հասնել այդ կետին։ Դե ուրեմն, նախ հանի՛ր գերանը քո աչքից, որպեսզի կարողանաս պարզորոշ տեսնել քո շուրջը գտնվող հրաշքները։

Անցյալ շաբաթ մենք աղոթքի մասին պատվիրան ունեինք։ Հիսուսը մեզ սովորեցնում է «Հայր մեր»-ը։ Մենք աղոթում ենք. «Հայր մեր, որ երկնքում ես, սուրբ թող լինի անունդ...»։ Այս աղոթքի մեջ մեր Երկնային Հորն ուղղված միակ խնդրանքն այն է, որ Նա ներում շնորհի մեր մեղքերի համար։ Ինչպե՞ս։ Նույն չափով, որով մենք ենք ներում ուրիշներին։ Մենք ասում ենք. «Թող մեզ մեր պարտքերը, ինչպես և մենք ենք թողնում մեր պարտապաններին»։ Այլ կերպ ասած՝ հենց այդ նույն չափանիշով մենք պիտի դատվենք։ Ինչպես այսօր ընթերցեցինք, Հիսուսը պատվիրում է չդատել։ Զգո՛ւյշ եղեք։ Այն նույն չափանիշով, որով մենք դատում ենք ուրիշներին, մենք ինքներս պիտի դատվենք։

Իրոք, այսօրվա դասը պարզ է, բայց իրագործելու համար՝ դժվար։ Սակայն Մեծ պահքը հենց դրա մասին է՝ պարզ, բայց դժվար։ Օգտագործե՛ք այս առիթը՝ նայելու ձեր հարաբերություններին սիրելիների, ամուսինների, երեխաների և ծնողների հետ։ Նայե՛ք ընկերների, գործընկերների, ծանոթների և այն մարդկանց հետ ունեցած ձեր հարաբերություններին, որոնց կցանկանայիք ճանաչել։ Տեսե՛ք այն դատողությունները, որոնք անում եք, և հասկացե՛ք, թե որքան արհեստական են դրանք։ Նայե՛ք ձեր նախապաշարմունքներին՝ նախնական դատողություններին, որոնք անում եք ամեն օր։ Մենք բոլորս ենք դատողություններ անում։ Դա չի նշանակում, որ մենք վատ մարդիկ ենք, դա պարզապես նշանակում է, որ մենք մարդ ենք։ Բայց այդ մարդկային էության մեջ դաս քաղե՛ք Հիսուս Քրիստոսից։ Դուք կարող եք սեր գտնել, և այդ սերը ձեզ շրջապատող մարդկանցից ավելի հեռու չէ։ Տեսե՛ք այն դժվարությունները՝ այդ «գերանները», որոնք աղավաղում են մեր ընկալումը և խանգարում մեզ տեսնելու այն գեղեցկությունը, որը մեր շուրջն է։

Մի՛ դատեք, որպեսզի չդատվեք։ Հանի՛ր գերանը քո աչքից... Այն, ինչ կբացահայտեք, այն է, որ դուք այլևս չեք կարողանա տեսնել եղբոր աչքի շյուղը։ Փոխարենը՝ կտեսնեք միայն Աստծո ներկայությունը։

Աղոթենք Սուրբ Ներսես Շնորհալու աղոթքներով.

Արդար Դատավոր, երբ գաս Հոր փառքով՝ դատելու կենդանիներին և մեռյալներին, մի՛ մտիր դատաստանի մեջ Քո ծառայի հետ, այլ փրկի՛ր ինձ հավիտենական կրակից և արժանացրո՛ւ լսելու արդարների երանավետ կանչը դեպի Քո երկնային արքայությունը։ Ողորմի՛ր Քո արարածներին և ինձ՝ մեծ մեղավորիս։ (Հավատով խոստովանում եմ #22/24)