Ծննդյան պահք 28-50. Պահեցողություն

Սուրբ Ծննդյան պահքի 50 օրերից 28-րդը. Պահք

Այսօրվա հատվածը խոսում է հավատքի դրսևորումների երրորդ հիմնասյան մասին։ Լեռան քարոզի այս հատվածում Հիսուսը խոսեց ողորմության գործերի, ապա՝ աղոթքի մասին։ Իսկ այսօր Նա շարունակում է...

Երբ պահք պահեք, տրտում մի՛ եղեք կեղծավորների պես, որոնք այլանդակում են իրենց երեսները, որպեսզի մարդկանց ցույց տան, թե պահք են պահում։ Ճշմարիտ եմ ասում ձեզ, նրանք ստացել են իրենց վարձքը։ Իսկ դու, երբ պահք պահես, օծի՛ր գլուխդ և լվա՛ երեսդ, որպեսզի մարդկանց չերևաս պահք պահող, այլ՝ քո Հորը, որ ծածուկ տեղում է. և քո Հայրը, որ տեսնում է ծածուկը, կհատուցի քեզ հրապարակավ։ (Մատթեոս 6:16-18)

Պահքը հավատքի այն երրորդ դրսևորումն է, որը, ըստ Տիրոջ բացատրության, Ձեր և Ձեր Արարչի միջև է։

Պահքը սննդից ֆիզիկական հրաժարումն է։ Աղոթքի և ողորմության գործերի պես՝ պահքը քրիստոնյայի կյանքում անհրաժեշտ ևս մեկ տարր է։ Հիսուսը ոչ միայն սովորեցրեց այն, այլև ինքը պահք պահեց, հատկապես՝ իր մկրտությունից հետո և ծառայությունը սկսելուց առաջ անապատում անցկացրած 40-օրյա մեկուսացման ընթացքում։

Պահքն ամրապնդում է անհատի կամքն ու վճռականությունը։ Պահքի ընթացքում մարդը քաղց է զգում, երբեմն՝ նաև ցավ։ Հենց ֆիզիկական այդ կարոտի պահերին ենք մենք հասկանում Հիսուսի խոսքերը՝ 40-օրյա պահքի ժամանակ ասված. «Մարդ միայն հացով չպիտի ապրի, այլ Աստծու բերանից ելնող ամեն խոսքով»։

Պահքի և աղոթքի կոչը Ձեր ուժեղ կողմերն ու սահմանները ճանաչելու կոչ է։ Անհրաժեշտ է պատրաստել և զորացնել Ձեր ներքին էությունը հոգևոր պատերազմի համար։ Արտաքին բոլոր ֆիզիկական պատերազմների հետևում կան ավելի մեծ հոգևոր ճակատամարտեր, որոնցից հնարավոր չէ խուսափել։ Հաճախ մարդիկ իրենց վախերի և խնդիրների լուծումները փնտրում են իրենցից դուրս։ Մեզանից յուրաքանչյուրն իր մեջ ունի լուծման մի մասը դառնալու կարողությունը։

Աղոթենք, Տեր և Աստված մեր՝ Հիսուս Քրիստոս։ Նախքան երկրի վրա Ձեր սուրբ ծառայությունը սկսելը, Դուք առանձնացաք և պահք պահեցիք։ Դուք մեզ սովորեցրիք, որ մենք միայն հացով չենք ապրում, այլ Աստծո բերանից ելնող ամեն խոսքով։ Թող այդ խոսքերը հագեցնեն արդարության մեր քաղցը և զորացնեն մեր հոգին ու խիղճը՝ խաղաղության և փոխըմբռնման համար հաստատուն կանգնելու։ Մենք շնորհակալություն ենք հայտնում Ձեզ՝ Հոր և Սուրբ Հոգու հետ միասին։ Ամեն։

Շապիկ՝ Լունա և Գրեգորի Բեյլերյան, 2023