Պատարագ. երկնքի և երկրի հանդիպումը

Մերօրյա թարգմանիչները. Սուրբ Պատարագ

Անցյալ շաբաթավերջին մենք նշեցինք Սուրբ Թարգմանչաց տոնը՝ մի խումբ մարդկանց, որոնց կյանքը տևել է հարյուրավոր տարիներ՝ 5-րդից 12-րդ դարերի ընթացքում։ Նրանց թարգմանչական շնորհը բարդ բանը հասկանալի դարձնելն էր։ Այս շաբաթ մենք կներկայացնենք մերօրյա թարգմանիչներին՝ մարդկանց, ովքեր հավատքի մի կողմը վերցնում և պարզաբանում են մեզ համար՝ թարգմանում են մեզ համար։ Այսօրվա պատգամը մեզ է փոխանցում Տեր Հեթում քահանան, ընթերցում է սարկավագ Քրիստափորը՝

Սուրբ Պատարագ. երկնքի և երկրի հանդիպումը:

Սուրբ Պատարագը պարզապես եկեղեցական արարողություն չէ։ Այն մարդկության պատմության ամենախորհրդավոր իրադարձություններից է, որտեղ ժամանակը միաձուլվում է հավերժությանը, երկիրը՝ երկնքին, իսկ մարդը՝ Աստծուն։ Այնտեղ, որտեղ աշխարհը սովոր է տեսնել հաց և գինի, հավատքի աչքերը տեսնում են Քրիստոսի Մարմինն ու Արյունը՝ որպես կյանքի, փրկության և անմահության պարգև։

Մարդը ստեղծված է ոչ միայն ապրելու, այլև Աստծո հետ հաղորդակցվելու համար։ Սակայն մեղքը խզեց այդ հաղորդակցությունը՝ մարդուն դարձնելով միայնակ, անհանգիստ և ներքուստ պառակտված։ Սուրբ Պատարագը Աստծո պատասխանն է այդ ողբերգությանը. այն հաշտության սեղան է, որտեղ Աստված կրկին կանչում է մարդուն Իր մոտ։ Այստեղ մարդը ոչ թե պարզապես հիշում է Քրիստոսին, այլ կենդանի կերպով մասնակցում է Նրա փրկագործությանը՝ Նրա խաչին, մահվանը և Հարությանը։

Փիլիսոփայական առումով մարդը միշտ փնտրում է կյանքի իմաստը, ճշմարտությունը և հավերժությունը։ Սակայն մարդկային բանականությունը, որքան էլ վեհ լինի, ինքնուրույն չի կարող հաղթահարել մահվան սահմանը։ Սուրբ Պատարագը ցույց է տալիս, որ հավերժությունը գաղափար չէ, այլ Անձ՝ Հիսուս Քրիստոս, Ով Իրեն տալիս է մարդուն որպես կյանքի հաց։ Այն, ինչ մարդկային միտքը չի կարող ստեղծել, Աստված շնորհում է Իր ողորմությամբ։

Սուրբ Պատարագը նաև սիրո դպրոց է։ Այն սովորեցնում է, որ մարդը չի կարող լինել իսկական քրիստոնյա, եթե չի սովորել ներել, զոհաբերել, շնորհակալ լինել և սիրել։ Սուրբ Հաղորդությունը անհատական բարեպաշտության պարզ գործողություն չէ. այն մեզ դարձնում է Քրիստոսի մեկ մարմինը՝ պատասխանատու միմյանց համար և կոչված՝ ծառայելու աշխարհին։

Այսօրվա աշխարհում, որտեղ աղմուկը հաճախ խլացնում է հոգու ձայնը, Սուրբ Պատարագը դառնում է լռության այն սրբավայրը, որտեղ մարդը կրկին գտնում է իրեն, ճանաչում Աստծուն և վերագտնում իր կյանքի իսկական նպատակը։ Այստեղ մենք չենք փախչում աշխարհից, այլ ստանում ենք այն շնորհը, որով կարող ենք փոխակերպել աշխարհը՝ սկսելով մեր սեփական սրտերից։

Սիրով հրավիրում ենք Ձեզ կիրակի առավոտյան մասնակցելու Սուրբ և Անմահ Պատարագին։

Եկե՛ք աղոթելու, ստանալու Սուրբ Հաղորդություն և վերագտնելու այն խաղաղությունը, որը միայն Քրիստոս կարող է պարգևել. «Ճաշակեցե՛ք և տեսե՛ք, որ քաղցր է Տերը» (Սաղմոս 33։9)։

Տեր Հեթումը ծառայում է որպես Հայաստանի Ախթալայի Սուրբ Աստվածածին վանքի հոգևոր հովիվ։ Միացեք մեզ վաղը՝ «Մերօրյա թարգմանիչները» շարքի հերթական թողարկմանը՝ «Armodoxy for Today»-ի շրջանակներում։